Letzd´s Joar im Oktober, do wa de 2004 Ausgabe von da "Salz und Öl" Rallye grod
vorbei, do hob i mi glei auf de näxte Ausgab von dera Musi gfreid. So hams
mi ogschriem im August, dann hob i glei zruggschriebm im August, dann hob i
glei gnennd und zoid und dann hob i boid zugkriagt das i wieda midfahrn
deaf. Und dann hob i mi wieda narrisch gfreid, aba wirkle gfreeeeeeeeid!
Tja, dann san ma am 14ten Nachmidogs im Oktober ausgruckt, um dem scheena
Hallein, (des is a do wo da Geisberg is) an Bsuach abzustattn. Mit ois
ausgrüst was a so a "Navigations"-Porsche so braucht - von de Stoppuhrn bis
zum Tripmaster, sogar a Nachtliachtl - ois ham ma dabeighabt. Aba gnutzt hods
uns nix, aba dazua später no a boa Worte.
Am Freitag ois recht knapp bemessen, san ma relativ Zeitgenau eitroffn. Da
Bua, des war mei Beifahrer, hod mit da Schnitttabein ois ausrechnen miassn.
Blos guad das a jetzt nein Johr scho in da Schui war. Dann hams uns auselassn
aufd Streck. Schnitte häd ma hoidn soin von um de 50 Sachan, des war a
scheene, schneie Gschicht. A boa Chinesn dazu und oamoi verfranst, dann
warst glei bei de Hoaza dabei. Irgendwann umana 10e auf dNacht hods dann a
weng zum Essn gem, aba zerst ham ma beim Miliär noa an Rundkurs fahrn
miassn in anana Kasern - in Deutschland undenkbar. A guads österreichisch
Kesselgulasch, dann is wieda dahi ganga. Und dann is kemma unsa Unglück.
Nachana Wandakartn häd ma fahrn soin, ham ma a gmacht, oba mia ham hoid koan
Cheyenne sondan an tiafan oidn 911. So san ma hoid üban Feidweg, wo i nach
300 Medda gsogt hob des is da foische Weg, da Bua hods a gmoand, dann san ma
hoid umdraht und ins Unterhoiz. Und da bis dahin fast ois passt hod, mia
natürle ganz weid foan warn, san uns de ganzn Briada hintn noch gfahrn. Wia
ma dann üban Rückweg auf san, san uns de olle noch, blos mia, wei ma ja de
erstn warn san stecka blim, de andan hoid neda. Aba uns is a ned langweilig
worn, weil a so a kloane NSU Kokubine (a rods Gschmusi hoid fürs dunkle
Hoiz) hod gmoand se muas se für mi Ölwanna aufreissn. So san ma dann
dringstandn im Hoiz. De andan san rückwärts raus, und mia san vorwärts
dringsteckt. De zeid is verrunna, mia ham uns de Max-Zeit eigfanga und mei
NSU Freindin natürle a. O´gfressn war i, i konns eich gor need song. Aufhean
woid i, grantig war i, hoamfahn, ois mögliche. Oba mei Spezl von da NSU
Fraktion hod gsogt aufhean dea ma fei need und den hods fui härter dawischt
wia mi. Oiso oba vom Gas, beruig di hod a gsogt. A Buidog hod uns dann wieda
ausazong, dann san ma schee gmiatle, da Bua und i, unsa Gschicht fertig
gfahrn. Ins Ziel san ma no kemma, und ned amoi als letzta, weil da hams se
welche deamasn verfranst, i glab de san imma no ned zruck - a heid no ned.
Am zwoatn dog ham ma amoi gschaugt wo ma so san, dann war ma irgenwo bei de
50zger drin. Ab jetzt hods g´hoasn, nua no zum Spass. Dogsüber de ganzn
Chinäsn wieda obfahrn, aufn Flugblotz a kloane rund auf Zeid drahn, um dann
nach ungefähr 250 Kilomäda bergauf, bergob wieda in Hallein an Stodgronprix
zum fahrn.
Do wars dann wieda mei Kokubine. Bei meiner Freindin is ja a um nix mehr
ganga, dann ham ma gsogt mia schaung uns Hallein amoi a wenig schneller o.
So ham ma dann engumschlunga a boar Kreisal draht. Des war a Freid wia dann
im zwoatn Umlauf de Pfeadl mid uns duachgana san, de Leid ham grod so
gschaugt.
Gwuna ham ma natürle nix mehr, aba da Bua hod gsogt "Papa, schee wars" und
des war as wichtigste für mi. I moan, a große Anerkennung an den
Veranstalter. A so a guade Veranstaltung für zwoa Dog hinzaubern, do ghead
wos dazua. Und oans wos i a scho, when moang a Briafal wieda im Postkastn
drin is, meid i mi für 2006 glei wieda o.
Wennds des ned lesn oda übasetzn kennt´s, do kennts a nochschaung:
Salzburg Rallye Club
PS: und folgendes jetzt auf Hochdeutsch:
Hat jemand Lust als Beifahrer auf dem Stuhle neben dem Fahrer Platz zu
nehmen? Suche für ein paar Gleichmäßigkeitsrallys in D, A, CH evtl. einen
Beifahrer. Aba versteh soid a mi scho!
Luftige und a bisse laude Boxergriass aus Zangberg,
Jürgen
